Ёмюрлюк жара
Уллу Малкъар дейле, уллу Малкъар дейле
Бу тау ауузунда эллеге.
Сауту эли дейле, Глашлары дейле
Къара къанла жаугъан жерлеге.
Къызыл аскерибиз, кеси аскерибиз
Элни тёгерегин алдыла.
Ёмюр-ёмюрлеге айтыла турурча,
Бир уллу къыйынлыкъ салдыла.
Кечени белинде жукъу арасында
Былай армау болгъан анала,
Огъурсуз окъладан къыркъылып тюшелле,
Тау улакъчыкълача, балала.
Къозулу къойлагъа бёрюле чапханча,
Къан жугъу болуп тишлери,
Бирден къырып алып, сора ёртен салып,
Ма былагъа этген ишлери.
Ёмюр-ёмюрледе унутулмаз кибик,
Аллай къыйынлыкъ салдыла.
Юйюрлери къара къатыш болгъан кече
Атала урушда къалдыла…
Раиса Токумаева